സുൽത്താൻ ബത്തേരി: നൂൽപ്പുഴ പഞ്ചായത്തിലെ വിവിധ ഉന്നതികളിൽ എൻഡിഎ സ്ഥാനാർഥി എ.എസ്. കവിത പര്യടനം നടത്തി.
ഇന്നലെ രാവിലെ വടക്കനാട് ഈച്ചക്കുന്ന് ക്ഷേത്രദർശനത്തോടെ ആരംഭിച്ച പര്യടനം താനുക്കുണ്ട് ഉന്നതി, വള്ളുവാടി ഉന്നതി, തിരുവന്നൂർ ക്ഷേത്രം, തിരുവന്നൂർ കുറുമ കോളനി, കോളൂർ കോളനി, മുത്തങ്ങ ആലത്തൂർ ഉന്നതി, കണ്ടാളംകുണ്ട് ഉന്നതി, കളനാടിക്കൊല്ലി ഉന്നതി, കർണ്ണാൽ ഉന്നതി, കോട്ടൂർ കുറുമ ഉന്നതി തുടങ്ങിയ സ്ഥലങ്ങളിൽ എത്തി.
പര്യടനത്തിനിടെ നിരവധി പരാതികളാണ് നാട്ടുകാർ സ്ഥാനാർഥിയെ അറിയിച്ചത്. മിക്ക ഉന്നതികളിലേക്കും സഞ്ചാരയോഗ്യമായ റോഡുകളടക്കം അടിസ്ഥാന സൗകര്യങ്ങൾ ഇല്ലെന്ന് നാട്ടുകാർ പറഞ്ഞു. വന്യമൃഗശല്യം മൂലം ജീവിക്കാൻ പ്രയാസമുണ്ടെന്നും അവർ പറഞ്ഞു.
പഞ്ചായത്തിലെ പുളയാടി അച്ചുതൻ അടക്കമുള്ള മുതിർന്ന നേതാക്കളെ സന്ദർശിച്ച് അനുഗ്രഹം തേടുകയും പൗരപ്രമുഖരുമായി കൂടിക്കാഴ്ച നടത്തുകയും ചെയ്തു. പര്യടനത്തിൽ നൂൽപ്പുഴ തെരഞ്ഞെടുപ്പ് ഇൻചാർജ് പി.ആർ. ലക്ഷ്മണൻ, സുരേന്ദ്രൻ ആവേത്താൻ, രഞ്ജിനി അരവിന്ദൻ, ധന്യ വിനോദ്, പഞ്ചായത്ത് പ്രസിഡന്റ് രാധാകൃഷ്ണൻ, മുകുന്ദൻ മാതമംഗലം, പ്രേമൻ പച്ചാടി എന്നിവർ നേതൃത്വം നൽകി.